Pidato Bahasa Betawi
Penulis: Sugeng Riyanto
Assalamu’allaikum warohmatullahi wabarokatu.
Naik kereta pergi ke Citayem
Tangan iseng petik melati
Kalau kite mau hidup ayem
Jage prilaku dan saling hormati
Yang mulie ibu bapak juri, guru-guru aye hormatin, serta temen-temen yang aye banggain.
Alhamdulillah, segale puji dan syukur kite panjatkan ke hadirat Allah SWT, karene atas nikmat sehat, nikmat umur panjang, ame nikmat kesempatan, hari ini kite masih bisa kumpul bareng di tempat yang penuh kebahagiaan ini.
Sholawat serta salam jangan sampe kite lupain buat Nabi besar kite, Nabi Muhammad SAW, beserta keluarga, sahabat, dan umatnye sampe akhir zaman.
Hadirin yang aye hormatin…
Kali ini aye pengen nyampein pidato tentang “Jadi Temen yang Bae”.
Kadang aye mikir ye, hidup di sekolah tuh mirip kayak naik angkot. Isinye macem-macem orang. Ade yang pendiem, ade yang rame, ade yang gampang ketawa, ade juge yang dikit-dikit ngambek. Tapi justru dari perbedaan itulah kite belajar hidup bareng.
Cuma sayangnye, kadang perkara kecil aje bisa bikin ribut gede. Cuma gara-gara beda pendapat, rebutan tempat duduk, salah ngomong dikit, atau kagak diajak main, eh langsung saling jutek-jutekan. Besoknye diem-dieman. Lusa bikin kelompok sendiri-sendiri. Padahal mah, temenan bukan perkara selalu setuju, tapi gimane carenye tetep saling ngerti walaupun pikiran kagak selalu same.
Aye kadang bingung juga. Yang satu bilang begini, yang sono maunye begitu. Ujung-ujungnye malah pada ngotot masing-masing. Kalo semue orang maunye diturutin terus, bisa-bisa tiap hari perang dunia ketige dah di kelas kite.
Padahal mah, banyak masalah bisa selesai kalo dibicarain baik-baik. Kagak usah pake marah-marah, kagak usah saling nyinggung. Ngobrol aje pelan-pelan. Kalo perlu sambil nyemil gorengan biar adem pikirannye. Soalnye kadang bukan masalahnye yang gede, tapi egonye yang kegedean.
Temen-temen…
Jadi temen yang bae itu bukan berarti harus selalu nraktir, selalu punya duit, atau selalu nurut ame kemauan orang lain. Tapi jadi temen yang bae itu artinye bisa saling ngehargain, saling nolong, dan kagak ninggalin temennye pas lagi susah.
Kadang ada temen yang keliatannye ketawa mulu, padahal lagi banyak masalah. Ada yang keliatannye jutek, padahal sebenernye lagi pengen ditemenin. Makanye jangan gampang ngejek atau ngomong seenaknye. Mulut kite kadang kecil, tapi omongannye bisa bikin hati orang sakit lame.
Aye percaya, kalo kite saling jage prilaku, jage omongan, dan saling hormat menghormati, sekolah bakal jadi tempat yang nyaman. Kagak ade lagi yang dibully, kagak ade lagi yang dijauhin, dan kagak ade lagi yang ngerase sendirian.
Orang-orang dulu pernah bilang:
“Lidi satu gampang dipatahkan, tapi kalo banyak jadi kuat buat nyapu.”
Artinye ape?
Kalo kite kompak, saling dukung, dan saling bantu, kite bakal jadi lebih kuat. Persahabatan yang baik itu bukan yang selalu ketawa bareng, tapi yang bisa tetep bareng pas lagi susah.
Temen-temen yang aye sayangin…
Mari kite belajar jadi temen yang bae. Kalo ade salah, belajar minta maaf. Kalo ade yang sedih, coba hibur. Kalo ade yang berbeda pendapat, jangan langsung dimusuhin. Soalnye hidup ini lebih indah kalo dijalanin pake hati yang adem, bukan emosi yang meledak-ledak.
Makan rambutan punye Bang Rohim
Metiknya pake gala sambungan
Biar kite kagak putus silaturahim
Mari kite jage terus pertemanan
Sekian pidato dari aye. Kurang lebihnye mohon dimaafin.
Wassalamu’allaikum warohmatullahi wabarokatu.
